മിന്നൽ പ്രളയം: വിദേശ സഹായം തേടി നേപ്പാൾ; നിലപാട് മാറ്റിയത് ഇന്ത്യയുടെ കടുത്ത സമ്മർദത്തെ തുടർന്ന്

കഠ്മണ്ഡു: നേപ്പാളിലുണ്ടായ മിന്നൽ പ്രളയത്തിൽ കാണാതായവരുടെ എണ്ണം കുത്തനെ ഉയർന്നതോടെ വിദേശ സഹായം തേടില്ലെന്ന മുൻ നിലപാട് തിരുത്തി നേപ്പാൾ സർക്കാർ. രക്ഷാപ്രവർത്തനത്തിന് സ്വന്തം നിലയിൽ വൈദഗ്ധ്യം ഉണ്ടെന്ന അവകാശവാദവുമായി ഇന്ത്യ ഉൾപ്പെടെയുള്ള രാജ്യങ്ങളുടെ സഹായ അഭ്യർത്ഥനകൾ നേപ്പാൾ ഇന്നലെ വരെ നിരസിച്ചിരുന്നു. എന്നാൽ ഇന്ത്യയുടെ ശക്തമായ നയതന്ത്ര ഇടപെടലുകളാണ് ഈ നിലപാട് മാറ്റത്തിന് പിന്നിൽ.

നേപ്പാളിലുണ്ടായ ദുരന്തത്തിൽ മുന്നൂറോളം ഇന്ത്യൻ പൗരന്മാരെ കാണാതായതായും, അവരുടെ സുരക്ഷയ്ക്കാണ് മുൻഗണനയെന്നും ഇന്ത്യൻ വിദേശകാര്യ മന്ത്രാലയം പരസ്യമായി വ്യക്തമാക്കിയിരുന്നു. മാത്രമല്ല നേപ്പാൾ സർക്കാർ അനുമതി നൽകിയാൽ ദേശീയ ദുരന്ത നിവാരണ സേനയെ ഉടൻ അയക്കാൻ തയ്യാറാണെന്നും ഇന്ത്യ പ്രഖ്യാപിച്ചു. ഈ പരസ്യ നിലപാട് രാജ്യാന്തര തലത്തിൽ നേപ്പാൾ സർക്കാരിന്മേൽ വലിയ സമ്മർദ്ദമുണ്ടാക്കിയതോടെയാണ് അവർ സഹായം സ്വീകരിക്കാൻ തയ്യാറായത്.

തുരങ്കങ്ങൾക്കുള്ളിൽ അടക്കം രക്ഷാപ്രവർത്തനം നടത്തുന്നതിൽ പ്രത്യേക വൈദഗ്ധ്യമുള്ള ഇന്ത്യൻ വിദഗ്ധ സംഘത്തെയാണ് ഇന്ത്യ ആദ്യം അയക്കുന്നത്. ഇതിനുപുറമെ ഡിഎൻഎ പരിശോധന, ഫൊറൻസിക് തുടങ്ങിയ പ്രത്യേക മേഖലകളിലെ സഹായവും നേപ്പാൾ വിദേശ രാജ്യങ്ങളോട് ഔദ്യോഗികമായി അഭ്യർത്ഥിച്ചിട്ടുണ്ട്.

നേപ്പാളിലുണ്ടായ കനത്ത മിന്നൽ പ്രളയത്തിൽ ഇതുവരെ 550 ലധികം പേർ ജീവൻ വെടിഞ്ഞു. നേപ്പാൾ ദുരന്തനിവാരണ അതോറിറ്റിയുടെ കണക്കുപ്രകാരം 1,924 പേരെയാണ് നിലവിൽ കാണാതായിട്ടുള്ളത്. നേപ്പാൾ ടൂറിസം ബോർഡിന്റെ റിപ്പോർട്ട് അനുസരിച്ച് കാണാതായ വിദേശികളിൽ ഭൂരിഭാഗവും ഇന്ത്യക്കാരാണ്.

ഔദ്യോഗിക കണക്കുകൾ പ്രകാരം 288 ഇന്ത്യക്കാരെയാണ് കാണാതായിരിക്കുന്നത്. 2015 ലെ ഭൂകമ്പകാലത്ത് വിദേശ സഹായം എത്തിയപ്പോൾ ഏകോപനത്തിലുണ്ടായ വീഴ്ചകളാണ് ആദ്യം വിദേശ സഹായം വേണ്ടെന്നുവയ്ക്കാൻ നേപ്പാളിനെ പ്രേരിപ്പിച്ചതെങ്കിലും നിലവിലെ സാഹചര്യം സർക്കാരിനെ ആ തീരുമാനം മാറ്റാൻ നിർബന്ധിതമാക്കുകയായിരുന്നു.