ബീഫ് സ്റ്റ്യൂ
ചേരുവകള്‍
- ബീഫ് – അര കിലോ
- സവാള – 2 എണ്ണം
- പച്ചമുളക് – 4 എണ്ണം
- ഇഞ്ചി വെളുത്തുള്ളി പേസ്റ്റ് – ഒന്നര ടേബിള്‍ സ്പൂണ്‍
- കാരറ്റ് – 1 എണ്ണം
- ബീന്‍സ് – 8-10 എണ്ണം
- ഗ്രീന്‍ പീസ്‌ – 50 ഗ്രാം
- ഉരുളക്കിഴങ്ങ് -1 എണ്ണം
- കറിവേപ്പില – 2 തണ്ട്
- അണ്ടിപ്പരിപ്പ് – 1/4 കപ്പ് (കുതിര്‍ത്ത് അരച്ചത്)
- കിസ്മിസ് – 10-12 എണ്ണം വീതം
- ഏലക്കായ – 4 എണ്ണം ഗ്രാമ്പു
- പട്ട – ഇടത്തരം കഷ്ണം
- തക്കോലം, ജാതിപത്രി – 1 വീതം
- കുരുമുളക് പൊടി – 1 ടീസ്പൂണ്‍
- രണ്ടാംപാല്‍ – ഒന്നര കപ്പ്
- ഒന്നാംപാല്‍ – 1 കപ്പ്
- വെളിച്ചെണ്ണ ആവശ്യത്തിനു
- നെയ്യ് – 1 ടീസ്പൂണ്‍
- ഉപ്പ്
പാകം ചെയ്യുന്ന വിധം
കഴുകി നുറുക്കി വെച്ചിരിക്കുന്ന ബീഫ് , ആവശ്യത്തിനു ഉപ്പും കുരുമുളക് പൊടിയും കഷണങ്ങള്‍ ആക്കി വെച്ചിരിക്കുന്ന ഉരുളക്കിഴങ്ങും ചേര്ത്തു കുക്കറില്‍ വേവിക്കുക. 5-6 വിസില്‍ വേണ്ടിവരും.
കാരറ്റ് , ബീന്‍സ്, ഗ്രീന്‍ പീസ്‌ എന്നിവ ചെറു കഷണങ്ങള്‍ ആക്കി ആവിയില്‍ 10 മിനുട്ട് വേവിച്ചെടുക്കുക. ( കളര്‍ നഷ്ടപ്പെടാതിരിക്കാനാണ് ആവിയില്‍ വേവിക്കുന്നത്‌ . ഓവനിലും വേവിച്ചെടുക്കാം )
കശുവണ്ടി പരിപ്പും കിസ്മിസും നെയ്യില്‍ ചെറുതായി വറുത്തു മാറ്റി വെക്കണം.
ഏലയ്ക്ക, കറുവപ്പട്ട, ഗ്രാമ്പൂ , ജാതിപത്രി , തക്കോലം എന്നിവ പതുക്കെ പൊടിക്കുക. ഫ്രൈയിംഗ് പാനില്‍ വെളിച്ചെണ്ണ ചൂടാക്കി, പൊടിച്ചത് ഇട്ട് വറുക്കുക. സവാള, ഇഞ്ചി, വെളുത്തുള്ളി , പച്ചമുളക്, കറിവേപ്പില എന്നിവ ചേര്‍ത്ത് വഴറ്റുക. സവാള ബ്രൗണ്‍ നിറമാവരുത്.
ഇതിലേക്ക് വേവിച്ചു വെച്ചിരിക്കുന്ന പച്ചക്കറികള്‍ ചേര്ത്തു യോജിപ്പിക്കുക. അതിനു ശേഷം രണ്ടാംപാല്‍ ചേര്‍ത്ത് അടച്ച് വേവിക്കുക.
ഇതിലേക്ക് വേവിച്ചു വെച്ചിരിക്കുന്ന ബീഫ് ചേര്ത്തു നന്നായി ഇളക്കി യോജിപ്പിച്ച് 5 – 6 മിനുട്ട് ചെറു തീയില്‍ വേവിക്കുക. ഒന്നാം പാലില്‍ കശുവണ്ടി അരച്ചത് ചേര്ത്തു ഇതിലേക്ക് ഒഴിക്കുക. ഗ്രേവി കട്ടിയാവുംവരെ ചെറുതീയില്‍ വേവിക്കണം. നെയ്യില്‍ വറുത്തു വെച്ചിരിക്കുന്ന കശുവണ്ടി പരിപ്പും കിസ്മിസും ഇതിലേക്ക് ചേര്ത്തു വാങ്ങാം
പാലപ്പം
ചേരുവകള്‍
- പച്ചരി – 3 കപ്പ്
- യീസ്റ്റ് – 1 ടീസ്പൂണ്‍
- തേങ്ങ ചിരവിയത് – 1/2 മുറി
- തേങ്ങാപ്പാല്‍ – 1 കപ്പ്
- ചോറ് – 3 ടേബിള്‍ സ്പൂണ്‍
- പഞ്ചസാര – 2 ടേബിള്‍ സ്പൂണ്‍
- ഉപ്പു – ആവശ്യത്തിനു
പാകം ചെയ്യുന്ന വിധം
അരി കഴുകി 8 മണിക്കൂര്‍ വെള്ളത്തില്‍ കുതിർക്കുക
യീസ്റ്റ് 1 ടീസ്പൂണ്‍പഞ്ചസാര ചേര്ത്തു ഇളക്കി , ഇളം ചൂട് വെള്ളത്തി 10 മിനുട്ട് പൊങ്ങാന്‍ വെക്കുക
4 ടേബിള്‍ സ്പൂണ്‍ അരി കുറച്ചു വെള്ളത്തില്‍ അരച്ച് , അതില്‍ നിന്ന് 1 ടേബിള്‍ സ്പൂണ്‍ അരച്ച മാവ് 1ഗ്ലാസ് വെള്ളത്തില്‍ കുറുക്കി തിളപ്പിച്ച് തണുപ്പിച്ചു എടുക്കുക.
അതിനു ശേഷം ബാക്കി അരിയും, തേങ്ങ ചിരവിയതും, ചോറും , തേങ്ങാപ്പാല്‍ ചേർത്ത് നന്നായി അരച്ചെടുക്കുക.
ഇതിലേക്ക് കുറുക്കി വെച്ചിരിക്കുന്നതും , കലക്കി വെച്ചിരിക്കുന്ന യീസ്റ്റും ചേര്ത്തു നന്നായി ഇളക്കി പൊങ്ങാന്‍ വെക്കുക.
നന്നായി പൊങ്ങിയതിനു ശേഷം ബാക്കിയിരിക്കുന്ന പഞ്ചസാരയും, ആവശ്യത്തിന് ഉപ്പും ചേര്ത്തു നന്നായി ഇളക്കി അര മണിക്കൂറിനു ശേഷം പാലപ്പച്ചട്ടിയില്‍ ചുട്ടെടുക്കാം
തയ്യാറാക്കിയത് ഷാന്റി ജോ
ക്രിസ്തുമസ് നവ വർഷ വിഭവങ്ങൾ - 1
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26