മലപ്പുറം: യുഡിഎഫിലേക്ക് വരാനുള്ള പി.വി അന്‍വറിന്റെ ശ്രമങ്ങള്‍ക്ക് പോസിറ്റീവ് സൂചനകള്‍. അന്‍വറിന്റെ യുഡിഎഫ് പ്രവേശനം വിശദമായി ചര്‍ച്ച ചെയ്യേണ്ടതുണ്ടെന്ന് മുസ്ലിം ലീഗ് അധ്യക്ഷന്‍ പാണക്കാട് സാദിഖലി ശിഹാബ് തങ്ങള്‍ പറഞ്ഞു. യുഡിഎഫ് ഇക്കാര്യം ചര്‍ച്ച ചെയ്ത് തീരുമാനിക്കുമെന്നും അന്‍വറുമായുള്ള കൂടിക്കാഴ്ചയ്ക്കു ശേഷം സാദിഖലി തങ്ങള്‍ മാധ്യമങ്ങളോട് പറഞ്ഞു.
അന്‍വര്‍ ഉയര്‍ത്തിപ്പിടിക്കുന്ന പ്രശ്നങ്ങളില്‍ യുഡിഎഫിന് എതിര്‍പ്പൊന്നുമില്ല. വന നിയമ ഭേദഗതി കുറച്ച് സങ്കീര്‍ണമാണ്. അവിടെ മനുഷ്യത്വപരമായ സമീപനം ഉണ്ടായിരിക്കണം. ഭേദഗതി നടപ്പില്‍ വന്നാല്‍ സാധാരണക്കാരുടെ ജീവിതത്തില്‍ വലിയ പ്രശ്നങ്ങള്‍ ഉണ്ടാകുമെന്നാണ് തോന്നുന്നത്. അതുകൊണ്ട് നിയമ ഭേദഗതി സര്‍ക്കാര്‍ പുനരാലോചിക്കണം. സങ്കീര്‍ണതകള്‍ പരിഹരിക്കണമെന്നും സാദിഖലി തങ്ങള്‍ ആവശ്യപ്പെട്ടു.
അടുത്ത നിയമസഭ തിരഞ്ഞെടുപ്പില്‍ യുഡിഎഫ് അധികാരത്തില്‍ വരണമെന്ന് അന്‍വര്‍ മാത്രമല്ല, കേരളത്തിലെ ജനങ്ങള്‍ മുഴുവന്‍ ആഗ്രഹിക്കുന്നുണ്ട്. അതിനു വേണ്ടതെന്താണോ അതെല്ലാം യുഡിഎഫ് ചെയ്യും. പത്ത് വര്‍ഷമായി യുഡിഎഫ് അധികാരത്തില്‍ നിന്നും വിട്ടു നില്‍ക്കുകയാണ്. ഇനിയും അധികാരത്തില്‍ നിന്നും വിട്ടു നില്‍ക്കാന്‍ സാധിക്കില്ല. അതിനാല്‍ അധികാരത്തില്‍ വരാന്‍ രാഷ്ട്രീയമായ എല്ലാ കാര്യങ്ങളും യുഡിഎഫ് സ്വീകരിക്കുമെന്നും പാണക്കാട് തങ്ങള്‍ പറഞ്ഞു.
യുഡിഎഫ് പ്രവേശനം സംബന്ധിച്ച് യുഡിഎഫ് നേതാക്കളാണ് ചര്‍ച്ച ചെയ്ത് തീരുമാനിക്കേണ്ടതെന്ന് പി.വി അന്‍വര്‍ പറഞ്ഞു. യുഡിഎഫുമായി സഹകരിക്കുമെന്ന് നേരത്തെ വ്യക്തമാക്കിയതാണ്. നിയമസഭ സമ്മേളനം നടക്കാനിരിക്കുന്ന സാഹചര്യത്തില്‍ നിലനില്‍ക്കുന്ന പ്രശ്നത്തെക്കുറിച്ചാണ് ഇപ്പോള്‍ ചര്‍ച്ച ചെയ്തത്.
പ്രതിപക്ഷ നേതാവ് വി.ഡി സതീശന്‍, കെ.സി വേണുഗോപാല്‍ അടക്കം കോണ്‍ഗ്രസിലെ എല്ലാ പ്രമുഖ നേതാക്കളെയും കാണും. വന നിയമവുമായി ബന്ധപ്പെട്ട് സമുദായ നേതാക്കളുമായി ചര്‍ച്ച നടത്തും. ജനകീയ പ്രശ്നമായതുകൊണ്ട് രാഷ്ട്രീയ, സമുദായ നേതാക്കളുടെയെല്ലാം പിന്തുണയുണ്ടെങ്കില്‍ മാത്രമേ തടയാന്‍ കഴിയൂ. അല്ലെങ്കില്‍ സഭയില്‍ ഇത് പാസാകുമെന്നും അന്‍വര്‍ പറഞ്ഞു.
അതിനിടെ പി.വി അന്‍വറിനോടുള്ള രാഷ്ട്രീയ നിലപാടില്‍ പ്രതിപക്ഷ നേതാവ് വി.ഡി സതീശന്‍ അയവു വരുത്തി. വ്യക്തിപരമായ ഇഷ്ടാനിഷ്ടങ്ങള്‍ക്ക് രാഷ്ട്രീയത്തില്‍ പ്രസക്തിയില്ല. ഉചിതമായ സമയത്ത് വ്യക്തമായ തീരുമാനം ഉണ്ടാകും. എന്തുവേണമെന്ന് യുഡിഎഫ് നേതൃത്വം കൂടിയാലോചിച്ച് തീരുമാനിക്കുമെന്ന് അദേഹം പറഞ്ഞു.
രാഷ്ട്രീയ പ്രവര്‍ത്തനത്തിന്റെ ഭാഗമായി ആരോപണ പ്രത്യാരോപണങ്ങള്‍ സ്വാഭാവികമാണ്. തനിക്കെതിരായി പി.വി അന്‍വറിനെക്കൊണ്ട് ആരോപണം ഉന്നയിപ്പിച്ചത് പിണറായി വിജയനാണെന്നും വി.ഡി സതീശന്‍ പറഞ്ഞു. ആരോപണം ഉന്നയിപ്പിച്ചയാള്‍ക്കെതിരെ പിന്നീട് അന്‍വര്‍ രംഗത്തു വന്നു. അതാണ് കാലത്തിന്റെ കാവ്യ നീതിയെന്നും പ്രതിപക്ഷ നേതാവ് പറഞ്ഞു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.