അമേരിക്കയുടെ സമ്മർദ്ദം ഫലം കണ്ടു; നിക്കരാഗ്വയിൽ രാഷ്ട്രീയ തടവുകാരെ മോചിപ്പിച്ചു

മനാഗ്വ: നിക്കരാഗ്വയിലെ ഡാനിയേൽ ഒർട്ടേഗ-റൊസാരിയോ മുറില്ലോ ഭരണകൂടത്തിന്റെ പത്തൊൻപതാം വാർഷികത്തോടനുബന്ധിച്ച് തടവിലാക്കപ്പെട്ട നിരവധി രാഷ്ട്രീയ തടവുകാരെ മോചിപ്പിച്ചു. അമേരിക്കയുടെ ശക്തമായ സമ്മർദ്ദത്തെത്തുടർന്നാണ് നിക്കരാഗ്വൻ ഭരണകൂടം ഈ തീരുമാനമെടുത്തത്.

"നാഷണൽ പെനിറ്റൻഷ്യറി സിസ്റ്റത്തിൽ ഉണ്ടായിരുന്ന ഡസൻ കണക്കിന് ആളുകൾ അവരുടെ കുടുംബങ്ങളിലേക്ക് മടങ്ങുകയാണ്" എന്ന് നിക്കരാഗ്വൻ ആഭ്യന്തര മന്ത്രാലയം ഹ്രസ്വ പ്രസ്താവനയിലൂടെ അറിയിച്ചു.

മോചിതരായവരുടെ പൂർണ്ണ വിവരങ്ങൾ സർക്കാർ പുറത്തുവിട്ടിട്ടില്ല. എങ്കിലും, ഏഴ് പ്രതിപക്ഷ അംഗങ്ങളുടെ മോചനം സ്ഥിരീകരിക്കാൻ എഫെ (EFE) ഏജൻസിക്ക് കഴിഞ്ഞു. പ്രാദേശിക മാധ്യമമായ ഡൈവർജെന്റസ് റിപ്പോർട്ട് ചെയ്യുന്നത് പ്രകാരം ഏകദേശം 30 രാഷ്ട്രീയ തടവുകാർക്ക് മോചനം ലഭിച്ചിട്ടുണ്ട്.

വെനസ്വേലയിലെ രാഷ്ട്രീയ മാറ്റങ്ങൾ സ്വേച്ഛാധിപത്യ ഭരണകൂടങ്ങളിൽ ഭയമുണ്ടാക്കിയിട്ടുണ്ടെന്ന് മുൻ നിക്കരാഗ്വൻ അംബാസഡർ ആർതുറോ മക്ഫീൽഡ്സ് യെസ്കാസ് പ്രതികരിച്ചു. അമേരിക്കൻ എംബസിയിൽ നിന്നുള്ള ലളിതമായ ഒരു പ്രസ്താവന പോലും ഏകദേശം 30 ശതമാനത്തോളം തടവുകാരുടെ മോചനത്തിലേക്ക് നയിച്ചത് ശ്രദ്ധേയമാണെന്നും അദേഹം കൂട്ടിച്ചേർത്തു.

നിക്കരാഗ്വയിൽ സ്വേച്ഛാധിപത്യ ഭരണത്തിനെതിരെ സമരം ചെയ്തവരെയും രാഷ്ട്രീയ എതിരാളികളെയും നിശബ്ദമാക്കാൻ വർഷങ്ങളായി ജയിലിലടച്ചിരിക്കുകയായിരുന്നു. അമേരിക്കയുടെ ഭാഗത്തുനിന്നുള്ള ചെറിയ സമ്മർദ്ദം പോലും വലിയ മാറ്റങ്ങൾക്ക് കാരണമാകുമെന്ന് ഈ നടപടി തെളിയിക്കുന്നു എന്നാണ് വിലയിരുത്തപ്പെടുന്നത്.