ഫേസ്ബുക്ക് പണിമുടക്കി; അപ്രതീക്ഷിത തകരാറിൽ വലഞ്ഞ് ലോകമെമ്പാടുമുള്ള ദശലക്ഷക്കണക്കിന് ഉപയോക്താക്കൾ

ന്യൂയോർക്ക്: ആഗോള സോഷ്യൽ മീഡിയ ഭീമനായ ഫേസ്ബുക്കിന്റെ സേവനങ്ങൾ പൂർണമായും തടസപ്പെട്ടു. ഇന്ന് (വെള്ളിയാഴ്ച) ഉച്ചയ്ക്ക് ശേഷമാണ് ലോകത്തിന്റെ വിവിധ ഭാഗങ്ങളിൽ നിന്നുള്ള ദശലക്ഷക്കണക്കിന് ഉപയോക്താക്കളെ ബുദ്ധിമുട്ടിച്ചുകൊണ്ട് ഫേസ്ബുക്ക്, മെസഞ്ചർ സേവനങ്ങൾ പെട്ടെന്ന് നിശ്ചലമായത്.

ആപ്പ് തുറക്കുമ്പോൾ ഫീഡുകൾ ലോഡ് ആകാതിരിക്കുകയും പലർക്കും തനിയെ അക്കൗണ്ടുകളിൽ നിന്ന് 'ലോഗ് ഔട്ട്' ആകുന്ന അവസ്ഥയുമാണ് ഉണ്ടായത്. വീണ്ടും ലോഗിൻ ചെയ്യാൻ ശ്രമിച്ചവർക്ക് "അപ്രതീക്ഷിത തകരാർ സംഭവിച്ചു" (Unexpected error occurred) എന്ന സന്ദേശമാണ് ലഭിക്കുന്നത്. വെബ്‌സൈറ്റ് പതിപ്പിൽ "Something went wrong" എന്ന എറർ മെസേജും കാണിക്കുന്നുണ്ട്.

ഇന്റർനെറ്റ് സേവനങ്ങളുടെ തകരാറുകൾ നിരീക്ഷിക്കുന്ന പ്രമുഖ വെബ്‌സൈറ്റായ 'ഡൗൺ ഡിറ്റക്ടർ' വഴി ലക്ഷക്കണക്കിന് ആളുകളാണ് ഇതിനകം പരാതികൾ റിപ്പോർട്ട് ചെയ്തിരിക്കുന്നത്. ആഗോളതലത്തിൽ ഉണ്ടായ ഈ പെട്ടെന്നുള്ള തകരാറിനെ തുടർന്ന് ഉപയോക്താക്കൾ വലിയ തോതിൽ തങ്ങളുടെ ആശങ്കകൾ എക്സ് പോലുള്ള മറ്റ് സോഷ്യൽ മീഡിയ പ്ലാറ്റ്‌ഫോമുകളിലൂടെ പങ്കുവെക്കുന്നുണ്ട്.

മെറ്റായുടെ കീഴിലുള്ള ഫേസ്ബുക്കിനെയും മെസ്സഞ്ചറിനെയുമാണ് ഈ തകരാർ പ്രധാനമായും ബാധിച്ചിരിക്കുന്നത്. എന്നാൽ ഇൻസ്റ്റാഗ്രാം, വാട്സാപ്പ് സേവനങ്ങളെ ഇത് കാര്യമായി ബാധിച്ചിട്ടില്ലെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.  തകരാറിനുള്ള കൃത്യമായ കാരണം എന്താണെന്ന് മെറ്റാ ഔദ്യോഗികമായി ഇതുവരെ വ്യക്തമാക്കിയിട്ടില്ല.

എങ്കിലും സാങ്കേതിക പ്രശ്നം പരിഹരിക്കാനുള്ള ശ്രമങ്ങൾ നടക്കുകയാണെന്നും ഉടൻ തന്നെ സേവനങ്ങൾ പുനസ്ഥാപിക്കുമെന്നും കമ്പനിയോട് അടുത്ത വൃത്തങ്ങൾ സൂചിപ്പിക്കുന്നു. ആപ്പുകൾ അൺഇൻസ്റ്റാൾ ചെയ്യുകയോ പാസ്‌വേഡ് മാറ്റാൻ ശ്രമിക്കുകയോ ചെയ്യേണ്ടതില്ലെന്നും ഇത് സെർവർ ഭാഗത്തുനിന്നുള്ള തകരാറാണെന്നും സാങ്കേതിക വിദഗ്ധർ വ്യക്തമാക്കുന്നു.