ഗർഭഛിദ്രത്തിനെതിരെ വേറിട്ട പ്രതിഷേധം; ഫിന്നിഷ് പാർലമെന്റിന് മുന്നിൽ ആയിരങ്ങൾ അണിനിരന്നു

ഹെൽസിങ്കി: ഫിൻലാൻഡിന്റെ ഹൃദയഭാഗമായ ഹെൽസിങ്കിയിൽ രാജ്യത്തെ നിയമനിർമ്മാണ സഭയുടെ പടികളിൽ ആയിരക്കണക്കിന് മെഴുകുതിരികൾ തെളിഞ്ഞു. ഗർഭഛിദ്രത്തിലൂടെ ജീവൻ നഷ്ടമായ കുഞ്ഞുങ്ങളെ അനുസ്മരിച്ചുകൊണ്ട് പ്രോലൈഫ് പ്രവർത്തകർ സംഘടിപ്പിച്ച 'മുയിസ്റ്റാമെ' (ഓർമ്മയിൽ) എന്ന പരിപാടിയാണ് നഗരത്തെ വികാരഭരിതമാക്കിയത്.

2024 ൽ ഫിൻലാൻഡിൽ നടന്ന ഓരോ ഗർഭഛിദ്രത്തെയും പ്രതിനിധീകരിച്ചാണ് 8,645 മെഴുകുതിരികൾ പാർലമെന്റ് മന്ദിരത്തിന്റെ പടികളിൽ നിരത്തിയത്. വൈകുന്നേരത്തെ മഞ്ഞുവീഴ്ചയ്ക്കിടയിലും അണയാതെ നിന്ന ഈ ദീപങ്ങൾ ഗർഭസ്ഥ ശിശുക്കളുടെ അവകാശങ്ങൾക്കായി വാദിക്കുന്ന പ്രസ്ഥാനങ്ങളുടെ നിശബ്ദ പ്രതിഷേധമായി മാറി.

ഗർഭഛിദ്രം വഴി മക്കളെ നഷ്ടപ്പെട്ട നൂറോളം പേർ നേരിട്ടെത്തി മെഴുകുതിരികൾ തെളിച്ചത് ചടങ്ങിനെ ഹൃദയസ്പർശിയാക്കി. "ഗർഭഛിദ്രം എന്നത് കേവലം ഒരു ശസ്ത്രക്രിയയല്ല അത് കുടുംബങ്ങൾ അനുഭവിക്കുന്ന വലിയൊരു നഷ്ടമാണ്. പലപ്പോഴും പുറം ലോകത്തോട് പറയാൻ കഴിയാത്ത സ്ത്രീകളുടെ ദുഖം അംഗീകരിക്കപ്പെടേണ്ടതുണ്ട്"- എന്ന് സംഘാടകരിൽ ഒരാളായ ജോഹന്നസ് ലെയ്റ്റിനൻ വ്യക്തമാക്കി.

ഓരോ വർഷവും രാജ്യത്ത് ഇല്ലാതാകുന്ന കുഞ്ഞുങ്ങളുടെ വൻതോതിലുള്ള കണക്കുകളെക്കുറിച്ച് പൊതുസമൂഹത്തിൽ കൃത്യമായ അവബോധം സൃഷ്ടിക്കുക എന്നതാണ് ഈ ഉദ്യമത്തിന്റെ പ്രാഥമിക ലക്ഷ്യം.

ഗർഭപാത്രത്തിൽ വെച്ച് തന്നെ ജീവൻ നഷ്ടമായ ഓരോ ശിശുവിനും അർഹമായ ബഹുമാനവും ആദരവും നൽകുക എന്ന മാനുഷിക പരിഗണന ഇതിനു പിന്നിലുണ്ട്. ഗർഭഛിദ്രത്തെക്കുറിച്ചുള്ള നിലവിലെ നിയമപരമായ ചർച്ചകളിൽ കേവല യുക്തിക്കപ്പുറം ഗൗരവമേറിയ ധാർമ്മിക കാഴ്ചപ്പാടുകൾ കൂടി ഉൾപ്പെടുത്തിക്കൊണ്ടുള്ള ഒരു സാമൂഹിക മാറ്റമാണ് പ്രസ്ഥാനം ലക്ഷ്യമിടുന്നത്.

ഫിൻലാൻഡിലെ ഇവാഞ്ചലിക്കൽ ലൂഥറൻ സഭാംഗങ്ങളിൽ വിശ്വാസപരമായ താല്പര്യം കുറഞ്ഞുവരുന്ന പശ്ചാത്തലത്തിൽ ഫിൻ‌ലാൻ‌ഡ്‌സ് റൈറ്റ് ടു ലൈഫ് അസോസിയേഷൻ പോലുള്ള സംഘടനകളുടെ ഇത്തരം നീക്കങ്ങൾ വലിയ ശ്രദ്ധയാണ് യൂറോപ്പിൽ നേടുന്നത്. ഓരോ വർഷവും നഷ്ടപ്പെടുന്ന കുഞ്ഞുങ്ങളുടെ എണ്ണം ജനങ്ങളെ പുനർചിന്തയ്ക്ക് പ്രേരിപ്പിക്കുമെന്ന് അസോസിയേഷൻ ചെയർമാൻ കിർസി മോർഗൻ-മക്കേ പ്രത്യാശ പ്രകടിപ്പിച്ചു.