കടുത്ത മതപീഡനങ്ങൾക്കിടയിലും പാകിസ്ഥാനിലെ ക്രൈസ്തവ സമൂഹം വിശ്വാസത്തിൽ വളരുന്നു; വെളിപ്പെടുത്തലുമായി ബിഷപ്പ് സാംസൺ ഷുക്കാഡിൻ

വത്തിക്കാൻ സിറ്റി: കടുത്ത മതപീഡനങ്ങളും കടുത്ത സാമൂഹിക വിവേചനങ്ങളും നിരന്തരം വേട്ടയാടുമ്പോഴും പാകിസ്ഥാനിലെ കത്തോലിക്ക വിശ്വാസ സമൂഹം തളരാതെ കൂടുതൽ കരുത്തോടെ മുന്നോട്ട് പോവുകയാണെന്ന് പാകിസ്ഥാൻ ബിഷപ്പ് കോൺഫറൻസ് പ്രസിഡന്റ് ബിഷപ്പ് സാംസൺ ഷുക്കാഡിൻ വ്യക്തമാക്കി. റോമിലെ തങ്ങളുടെ ഔദ്യോഗിക 'അദ് ലിമിന' സന്ദർശനത്തിന്റെ ഭാഗമായി ലിയോ പതിനാലാമൻ മാർപാപ്പയുമായി നടത്തിയ കൂടിക്കാഴ്ചയ്ക്ക് ശേഷം വത്തിക്കാൻ ന്യൂസിന് നൽകിയ പ്രത്യേക അഭിമുഖത്തിൽ സംസാരിക്കുകയായിരുന്നു അദ്ദേഹം.

പാകിസ്ഥാൻ പോലൊരു രാജ്യത്ത് ക്രൈസ്തവ വിശ്വാസിയായി ജീവിക്കുക എന്നത് വലിയ വെല്ലുവിളികൾ നിറഞ്ഞതാണെന്നും എന്നാൽ ഈ പ്രതിസന്ധികളെല്ലാം സഭയെ കൂടുതൽ ഒന്നിപ്പിക്കുകയാണ് ചെയ്യുന്നതെന്നും ബിഷപ്പ് ചൂണ്ടിക്കാട്ടി. പാകിസ്ഥാനിലെ ക്രൈസ്തവരും മറ്റ് മതന്യൂനപക്ഷങ്ങളും നേരിടുന്ന സുരക്ഷാ ഭീഷണികളെക്കുറിച്ചും നിയമപരമായ വിവേചനങ്ങളെക്കുറിച്ചും ബിഷപ്പ് സാംസൺ ഷുക്കാഡിൻ അഭിമുഖത്തിൽ വിശദീകരിച്ചു. പലപ്പോഴും കള്ളക്കേസുകളിൽ കുടുക്കപ്പെടുന്നതും ആരാധനാലയങ്ങൾക്ക് നേരെയുണ്ടാകുന്ന അതിക്രമങ്ങളും വിശ്വാസി സമൂഹത്തിൽ വലിയ ആശങ്കയുണ്ടാക്കുന്നുണ്ട്.

എന്നാൽ ഈ കനത്ത പ്രതിസന്ധികൾക്കിടയിലും തങ്ങളെ ചേർത്തുപിടിച്ച ലിയോ പതിനാലാമൻ മാർപാപ്പയുടെ വാക്കുകൾ വലിയ പ്രത്യാശയാണ് നൽകുന്നതെന്ന് അദ്ദേഹം പറഞ്ഞു. പാകിസ്ഥാനിലെ വിശ്വാസികൾക്കായി മാർപാപ്പ പ്രത്യേകമായി പ്രാർത്ഥിക്കുന്നുണ്ടെന്നും അവരുടെ സഹനങ്ങളിൽ വത്തിക്കാൻ ഒപ്പമുണ്ടെന്നുമുള്ള ഉറപ്പ് സഭയ്ക്ക് പുതിയ ഊർജം നൽകുന്നതാണെന്ന് ബിഷപ്പ് കൂട്ടിച്ചേർത്തു.

മതസ്വാതന്ത്ര്യവും മനുഷ്യാവകാശങ്ങളും സംരക്ഷിക്കപ്പെടാൻ അന്താരാഷ്ട്ര സമൂഹം പാകിസ്ഥാനിലെ ന്യൂനപക്ഷങ്ങൾക്ക് വേണ്ടി ശബ്ദമുയർത്തണമെന്ന് ബിഷപ്പ് ശക്തമായി ആവശ്യപ്പെട്ടു. "പാകിസ്ഥാനിലെ ന്യൂനപക്ഷങ്ങളുടെ അവകാശങ്ങൾ സംരക്ഷിക്കപ്പെടാൻ ലോകരാജ്യങ്ങളുടെയും അന്താരാഷ്ട്ര സംഘടനകളുടെയും സജീവമായ ഇടപെടൽ ആവശ്യമാണ്. കേവലം രാഷ്ട്രീയമായ പിന്തുണയ്ക്കപ്പുറം പ്രാർത്ഥനയോടെ ഞങ്ങളുടെ വിശ്വാസ സമൂഹത്തിന് ഒപ്പം നിൽക്കാൻ ലോകമെമ്പാടുമുള്ള ജനാധിപത്യ വിശ്വാസികൾ തയ്യാറാകണം."- ബിഷപ്പ് സാംസൺ ഷുക്കാഡിൻ പറഞ്ഞു.

ഭരണകൂടങ്ങളുടെ ഭാഗത്തുനിന്ന് കൂടുതൽ സുരക്ഷിതത്വവും തുല്യനീതിയും ഉറപ്പാക്കാൻ അന്താരാഷ്ട്ര സമ്മർദം അത്യന്താപേക്ഷിതമാണെന്ന് ഓർമ്മിപ്പിച്ചുകൊണ്ടാണ് അദേഹം തന്റെ അഭിമുഖം അവസാനിപ്പിച്ചത്. വത്തിക്കാനിൽ പാകിസ്ഥാൻ സഭാ നേതൃത്വം നടത്തിയ ഈ വെളിപ്പെടുത്തലുകൾ ആഗോളതലത്തിൽ വലിയ ശ്രദ്ധ നേടിക്കഴിഞ്ഞു.