യുവതലമുറയെ വിശ്വാസത്തിലേക്ക് തിരികെ എത്തിക്കാൻ 'മെയ് മാസ ജപമാല'; ബംഗ്ലാദേശിൽ കത്തോലിക്കാ സമൂഹത്തിന്റെ സജീവ ഇടപെടൽ

ധാക്ക: ആധുനിക ലോകത്തെ തിരക്കുകൾക്കിടയിൽ വിശ്വാസത്തിൽ നിന്നും സഭാ പ്രവർത്തനങ്ങളിൽ നിന്നും അകന്നു പോകുന്ന യുവതലമുറയെ ക്രിസ്തുമാർഗ്ഗത്തിലേക്ക് തിരികെ കൊണ്ടുവരാൻ ലക്ഷ്യമിട്ട് ബംഗ്ലാദേശിലെ കത്തോലിക്കാ സമൂഹം. പരമ്പരാഗത ജപമാല മാസമായ മെയ് മാസത്തിൽ വീടുകൾ, ഹോസ്റ്റലുകൾ, ഗ്രോട്ടോകൾ എന്നിവ കേന്ദ്രീകരിച്ച് വിപുലമായ പ്രാർത്ഥനാ പരിപാടികളാണ് വിവിധ രൂപതകളുടെ നേതൃത്വത്തിൽ സംഘടിപ്പിച്ചിരിക്കുന്നത്.

വിവിധ യുവജന സംഘടനകൾ, മാതൃവേദികൾ, വൈദികർ, സന്യാസിനികൾ എന്നിവരുടെ നേതൃത്വത്തിൽ നഗര-ഗ്രാമ വ്യത്യാസമില്ലാതെ ജപമാല പ്രാർത്ഥനകൾ സജീവമായി നടക്കുന്നു. മൈമൻസിങ് രൂപതയുടെ യൂത്ത് കമ്മീഷൻ നഗരങ്ങളിലെ ഹോസ്റ്റലുകളിൽ താമസിക്കുന്ന വിദ്യാർത്ഥികളെ ലക്ഷ്യമിട്ട് പ്രത്യേക ഒരു മാസത്തെ പ്രാർത്ഥനാ പദ്ധതിക്ക് തുടക്കം കുറിച്ചിട്ടുണ്ട്. കച്ചിഷുലി പ്രദേശത്തെ ഒരു സ്റ്റുഡന്റ് ഹോസ്റ്റലിൽ വെച്ച് വിശുദ്ധ കുർബാനയോടും ജപമാലയോടും കൂടിയാണ് ഈ ദൗത്യം ആരംഭിച്ചത്.

ഈ പ്രാർത്ഥനാ കൂട്ടായ്മകൾ യുവാക്കൾക്ക് പരസ്പരം ബന്ധപ്പെടാനും തങ്ങളുടെ വിശ്വാസത്തിലും ജീവിത ലക്ഷ്യങ്ങളിലും കൂടുതൽ ശുഭാപ്തി വിശ്വാസം പുലർത്താനും സഹായിക്കുന്നതായി യൂത്ത് കമ്മീഷൻ സെക്രട്ടറി ചർച്ചിൽ മ്രോങ് വ്യക്തമാക്കി. ഈ പ്രാർത്ഥന യുവാക്കളിൽ വലിയ നല്ല മാറ്റങ്ങൾ കൊണ്ടുവരുമെന്നാണ് പ്രതീക്ഷയെന്നും, ഇത് വെറുമൊരു പ്രാർത്ഥന മാത്രമല്ല, മറിച്ച് കുടുംബബന്ധങ്ങളും പ്രാദേശിക ഐക്യവും ദൃഢമാക്കാനുള്ള ഒത്തുചേരൽ കൂടിയാണെന്നും അദേഹം കൂട്ടിച്ചേർത്തു.

തലസ്ഥാനമായ ധാക്കയിലെ തേജഗാവ് ഹോളി റോസറി ചർച്ചിൽ മെയ് മാസത്തിലെ എല്ലാ ചൊവ്വാഴ്ചകളിലും ബുധനാഴ്ചകളിലും പ്രത്യേക ജപമാല പ്രാർത്ഥനയും വിശുദ്ധ കുർബാനയും അർപ്പിച്ചു പോരുന്നു. സമൂഹത്തിന്റെ വിവിധ തുറകളിലുള്ള നൂറുകണക്കിന് വിശ്വാസികളാണ് ഇതിൽ പങ്കുചേരുന്നത്. പ്രാർത്ഥനയ്ക്ക് ശേഷം മാതാവിന്റെ ഗ്രോട്ടോയ്ക്ക് മുന്നിൽ മെഴുകുതിരികൾ തെളിയിച്ച് വ്യക്തിപരമായ പ്രാർത്ഥനകൾക്കായി നിരവധി പേർ ഇവിടെ സമയം ചിലവഴിക്കുന്നുണ്ട്.

മാതാവിലൂടെ ഈശോയിലേക്ക് അടുക്കുക എന്നതാണ് ജപമാലയുടെ ലക്ഷ്യമെന്നും മാതാവിന്റെ വിനയവും അനുസരണവും നമ്മുടെ ജീവിതത്തിലും പകർത്താൻ ഈ പ്രാർത്ഥന സഹായിക്കുമെന്നും ഹോളി റോസറി ചർച്ച് വികാരി ഫാദർ ജയന്തോ എസ്. ഗോമസ് ഓർമ്മിപ്പിച്ചു.

വടക്കൻ ബംഗ്ലാദേശിലെ നാടോർ ജില്ലയിലുള്ള ഗോപാൽപൂർ കാത്തലിക് ചർച്ചിലെ വിശ്വാസികൾ മെയ് മാസത്തിലെ എല്ലാ ബുധനാഴ്ചകളിലും ഇടവക സെമിത്തേരിയിൽ ഒത്തുകൂടിയാണ് ജപമാല അർപ്പിക്കുന്നത്. ഇതിന് പുറമെ, ചുറ്റുമുള്ള ഗ്രാമങ്ങളിൽ അമ്മമാർ ഗ്രൂപ്പുകളായി തിരിഞ്ഞ് വീടുകൾ തോറും കയറിയിറങ്ങി ജപമാല പ്രാർത്ഥനകൾക്ക് നേതൃത്വം നൽകുന്നു.

ആളുകൾ ഭൗതിക കാര്യങ്ങളിൽ അതീവ ശ്രദ്ധാലുക്കളാകുകയും പ്രാർത്ഥനയ്ക്കുള്ള സമയം കുറയുകയും ചെയ്യുന്ന ഇന്നത്തെ സാഹചര്യത്തിൽ സഭ കൂടുതൽ കാലോചിതമായ മാറ്റങ്ങളോടെ ആളുകളെ പ്രാർത്ഥനയിലേക്ക് ആകർഷിക്കണമെന്ന് വിശ്വാസിയായ മേരി റൊസാരിയോ അഭിപ്രായപ്പെട്ടു. ലോകത്ത് ഏറ്റവും കൂടുതൽ ക്രൈസ്തവ ജനസംഖ്യയുള്ള രാജ്യങ്ങളിലൊന്നായ ബംഗ്ലാദേശിൽ യുവജനങ്ങളെ കേന്ദ്രീകരിച്ച് നടക്കുന്ന ഈ ആത്മീയ മുന്നേറ്റം ഏറെ പ്രതീക്ഷയോടെയാണ് സഭ കാണുന്നത്.